投資過度緊張,小心身體響起警號

股市動盪,經常大上大落,投資者若無法管理好個人情緒,容易造成精神緊張,並患上焦慮症、驚恐症及抑鬱症。以下部份特徵你有出現過嗎?

  • 不論投資輸贏,心跳長期跳得好快
  • 狂躁及抑鬱
  • 狀態一直繃緊,機不離手
  • 出現失眠、緊張及胃痛
  • 抖唔到氣、手震及出汗
  • 早醒及發噩夢

紓緩方法分理性感性

若股市升跌,令你心情起伏大,就要同時採用理性及感性方法處理。理性方法包括設止賺止蝕、控制投資金額,並了解個人投資風險承受能力。另外,若自己冇咩金融知識,建議上投資課程,了解股市運作。有興趣玩衍生產品如牛熊證及窩輪,特別需要熟悉其理論,若最終發現自己唔擅長運用呢類進階投資工具,就建議停手。

至於感性嘅方法,包括察覺自己有問題,例如有冇周身唔舒服,成日望住市況導致過分緊張等。而紓緩緊張情緒嘅方法就包括深呼吸、肌肉鬆弛、做瑜伽、意象鬆弛及靜觀治療等。如果較為嚴重嘅,則會影響工作、人際關係及判斷力,就要食藥或尋求心理治療。

注意飲食習慣、睡眠質素及運動量,若生活習慣忽然改變,如以前食得好健康,但近排暴飲暴食,胃痛多咗、失眠,呢啲都係情緒出現問題嘅先兆。

有情緒問題唔一定係病,要衡量其嚴重程度。有啲情緒問題,只令人覺得唔舒服、唔開心,但冇影響個人日常生活。而嚴重啲嘅,則會影響日常生活。至於抑鬱症嘅病徵,包括食唔安、瞓唔落、心跳加速、做事唔起勁、煩躁緊張、情緒低落及思想負面等。但要確診抑鬱病,都要連續兩周日日都有呢啲身體反應。若一周只有三、四日出現身體毛病,咁只可以算係情緒波動。

你有無患情緒病啊?

「第一,你有冇覺得驚慌或低落?有冇輕生意念?」如果有,就要學識收埋佢;「第二,周圍有冇人幫到你?」要知身邊仲有人同你傾訴解愁;「第三,以前有冇試過同樣經歷,例如克服股災?」諗番以前點應對,然後勇敢面對今次嘅難關;「第四,最影響你嘅情緒係咩?」學識形容自己心情,以及尋找情緒根由。

散戶輸到暈 運動減壓

見過有病人因為太緊張,唔記得呼吸節奏,所以會教佢哋做抖氣活動。另外,多做帶氧運動,如行山及做瑜伽都可以減壓。有時約三五知己談天說地,亦可暫時拋低煩惱。

如有問題應及早求醫

唔好有投機心態,要衡量自己投資風險承受能力,同時要節制,有個別投資者買少許而贏咗,之後形成心癮並一直買落去。另外,如懷疑自己有情緒問題,宜及早求醫。部分求診患者,係家人叫佢去睇醫生,本身欠主動,情緒問題因而較難解決。

發佈留言

發佈留言必須填寫的電子郵件地址不會公開。 必填欄位標示為 *